ஹாட்ரிக் நாயகி சாய்னா நெஹ்வால்

ஜூன் 2010… இந்திய பேட்மிண்டன் வரலாற்றில் மறக்க முடியாத மாதம். தொடர்ச்சியாக மூன்று ஞாயிற்றுக் கிழமைகள்; இந்தியன் ஓபன், சிங்கப்பூர் ஓபன், இந்தோனேசிய ஓபன் என்று மூன்று சர்வதேச போட்டிகளில் இந்திய வீராங்கனை சாய்னா நெஹ்வால் சாம்பியன் பட்டங்களை வென்று ‘ஹாட்ரிக்’ சாதனை படைத்திருக்கிறார்.

விம்பிள்டனில் சானியா ஏமாற்றினாலும், இந்தோனேசியாவில் இந்தியக் கொடியை உயர்த்திப் பிடித்து ஈடுகட்டியது இந்த சக ஐதராபாத் தேவதை. 1980ல் ஸ்வீடிஷ் ஓபன், டேனிஷ் ஓபன், ஆல் இங்லேண்ட் போட்டிகளில் தொடர்ச்சியாக வென்று உலகின் நம்பர் 1 வீரராக பிரகாஷ் படுகோன் அசத்தியிருந்தார்.

அதற்கு இணையானதொரு அஸ்வமேத யாகத்தை வெற்றிகரமாக நடத்திக் காட்டியிருக்கும் சாய்னா, உலக அளவில் 3வது ரேங்க்கை எட்டிப் பிடித்திருக்கிறார். சாய்னாவின் எழுச்சியால், இதுவரை ஆதிக்கம் செலுத்தி வந்த சீன வீராங்கனைகளின் சப்பை மூக்குகள் வியர்த்துப் போயுள்ளன. ‘விரைவில் நம்பர் 1’ என்ற சாய்னாவின் முழக்கம் அவர்களின் காதுகளில் எச்சரிக்கை மணியாக எதிரொலித்துக் கொண்டிருக்கிறது.

‘ரேங்க் ஒரு பக்கம் இருந்தாலும், அடுத்தடுத்த தொடர்களில் பட்டம் வெல்வதில் மட்டுமே கவனம் செலுத்துவேன். சீன வீராங்கனைகள் மட்டுமல்ல… யாரைப் பார்த்தும் எனக்கு பயம் கிடையாது. பிட்னஸ்தான் ஒரே பிராப்ளம். காயம் ஏதும் ஏற்படாமல் இருந்தால் போதும். வெற்றி நடை தொடரும்’ என்று நம்பிக்கை பொங்கி வழிய உற்சாகமாகக் கூறுகிறார் சாய்னா. ஹரியானாவில் பிறந்தாலும் இவருக்கு சொந்த ஊர் என்றால் ஐதராபாத் தான். அப்பா டாக்டர் ஹர்வீர் சிங், அம்மா உஷா நெஹ்வால் இருவருமே பேட்மிண்டன் பிளேயர்கள் என்பதால் சாய்னாவின் ஒவ்வொரு செல்லிலும் இந்த விளையாட்டு ஊறியிருக்கிறது.

‘விடா முயற்சி, நம்மால் முடியும் என்ற அசைக்க முடியாத நம்பிக்கை, எப்படிப்பட்ட நெருக்கடியாக இருந்தாலும் மனம் தளராமல் போராடுவது சாய்னாவின் ஸ்பெஷாலிடி. இந்திய வீரர், வீராங்கனைகளில் இத்தனை துணிச்சலானவரை பார்ப்பது மிக மிக அபூர்வம்’ என்று பாராட்டுகிறார் பிரகாஷ் படுகோன். பயிற்சியாளர்கள் கோபிசந்த், அதிக் ஜவுஹாரி இருவரும் தங்கள் மாணவியைப் பற்றி புகழ்ந்து தள்ளுகிறார்கள். பாராட்டு மழையில் நனைந்து கொண்டிருக்கும் சாய்னாவின் பிராண்ட் வேல்யூ ரூ.40 கோடியையும் தாண்டி எக்கச்சக்கமாய் எகிறிக் கொண்டிருக்கிறது.

ஐதராபாத்தில் நடந்த விழாவில் மாநில முதல்வர் ரோசய்யா ரூ.25 லட்சம் ரொக்கப் பரிசு அறிவித்திருக்கிறார். இந்திய பேட்மிண்டன் சங்கம் தன் பங்குக்கு ரூ.5 லட்சம் வழங்க உள்ளது. காமன்வெல்த், ஆசிய விளையாட்டு, உலக சாம்பியன்ஷிப், ஒலிம்பிக் என்று 20 வயது சாய்னாவின் இலக்கு விரிந்து கொண்டிருப்பதால் இந்தப் பரிசெல்லாம் ‘டோக்கன் அட்வான்ஸ்’ தான் என்பதில் எந்த சந்தேகமும் இல்லை.

பா.சங்கர்

சதுரங்க சக்கரவர்த்தி…

பல்கேரியா கொண்டான் பராக்…பராக்

இந்திய செஸ் ரசிகர்கள் ஆனந்தக் கடலில் நீந்திக் கொண்டிருக்கிறார்கள். இருக்காதா பின்னே! நம்ம ஆனந்த் நான்காவது முறையாக உலக சாம்பியன் பட்டத்தை வென்றது சாதாரண சாதனையா என்ன? ஒட்டு மொத்த விளையாட்டு உலகமும் அன்னாந்து பார்க்கிறது.

நடப்பு சாம்பியனான ஆனந்த், இந்த ஆண்டுக்கான உலக சாம்பியன்ஷிப் போட்டியில் பல்கேரியாவின் வேசலின் டோபலாவுடன் மோதப் போகிறார் என்பது தெரிந்ததுமே ரசிகர்கள் பரபரக்க ஆரம்பித்துவிட்டனர்.

போட்டி தொடங்கப்போகும் சமயம் பார்த்து, ஐஸ்லாண்டில் எரிமலை வெடித்துச் சீற, உலகமெங்கும் விமானப் போக்குவரத்து முடங்கியது. வேறு வழியில்லாமல் பிராங்க்பர்ட்டில் இருந்து 40 மணி நேரம் காரில் பயணித்து, அவசரம் அவசரமாக சோபியா போய் சேர்ந்தார் ஆனந்த். பயணக் களைப்பு தீர்வதற்குள்ளாகவே செஸ் டேபிளில் டோபலாவை எதிர்கொள்ள வேண்டிய நெருக்கடி.

பதற்றத்துடன் ஆடிய ஆனந்துக்கு அதிர்ச்சி தோல்வி. இன்னும் 11 ஆட்டங்கள் இருந்தாலும் முதல் கோணல் முற்றிலும் கோணலாகிவிடக் கூடாதே என்ற கவலையில் இந்திய ரசிகர்கள். சுதாரித்துக் கொண்ட ஆனந்த் பதிலடி கொடுக்க போட்டி சூடு பிடித்தது. 12வது கடைசி ஆட்டம்… இரண்டு வீரர்களும் தலா 5.5 புள்ளிகளுடன் சமநிலையில். யார் வென்றாலும் அவர்தான் சாம்பியன். இந்த ஆட்டமும் டிராவானால் டைபிரேக்கரில் விரைவு சுற்றாக நான்கு ஆட்டங்களில் மோத வேண்டும். ரேப்பிட் முறை ஆட்டத்தில் ஆனந்த் கில்லாடி. அல்வா சாப்பிடுற மாதிரி அசத்திவிடுவார் என்பதால், கடைசி ஆட்டம் டிரா ஆனால் கூட போதும் என்று ரசிகர்கள் பிரார்த்தித்தனர்.

வெள்ளைக் காய்களுடன் ஆரம்பித்த டோபலாவ் போட்டுத் தாக்கினார். தற்காப்பு ஆட்டத்தில் போக்கு காட்டிக் கொண்டிருந்தார் ஆனந்த். எதிர் முகாம் கை ஓங்கிக் கொண்டே இருந்தது. ஒரு அமர்க்களமான நகர்த்தலில் டோபலாவின் ராணியை ஆனந்த் தீர்த்துக்கட்ட, ஆட்டத்தின் போக்கு அடியோடு மாறியது. டென்ஷனான ஆட்டத்தில் ஆனந்த் வெற்றியை முத்தமிட இந்திய ரசிகர்கள் துள்ளிக் குதித்தனர். ஒன்றல்ல…இரண்டல்ல நான்காவது முறையாக உலக சாம்பியன் பட்டம் ஆனந்த் கைகளில். செஸ் உலக சாம்பியன் பட்டத்தை தொடர்ச்சியாக மூன்று முறை வென்ற முதல் வீரர் என்ற பெருமையும் அவருக்கு சேர்ந்துள்ளது. ‘நான் விளையாடியதிலேயே மிக மிக சிக்கலான, நெருக்கடியான, கடினமான ஆட்டம் இதுதான். டோபலாவை தவறாகக் கணித்துவிட்டேன். மனிதர் சாலிடாக எதிர்த்து மோதினார்’ என்று நிம்மதிப் பெருமூச்சு விடுகிறார் ஆனந்த்.

’போட்டியை ஆன்லைனில் பார்த்துக் கொண்டிருந்தோம். கடைசி ஆட்டம் விறுவிறுப்பாக போனதால் இருப்புக் கொள்ளவில்லை. ஆனந்த் கொஞ்சம் கூட பதற்றம் இல்லாமல் விளையாடினான். அவன் வெற்றி பெற்றதும் துள்ளிக் குதித்தோம். நல்ல வேளையாக போட்டி டைபிரேக்கர் வரை போகவில்லை’ என்றார் ஆனந்தின் அம்மா.

உலக கோப்பை டி20ல் இந்திய அணியின் மோசமான ஆட்டத்தால் சூடாகியிருந்த ரசிகர்களை, ஆனந்தின் வெற்றி கோடை மழையாக குளிர்வித்திருக்கிறது. இந்த வாரம் தாயகம் திரும்பும் உலக சாம்பியனை வரவேற்க சென்னை ரசிகர்கள் ஆவலோடு காத்துகொண்டிருக்கின்றனர். மறுபடியும் தலைப்பை படிங்க.

பா.சங்கர்

அர்ஜெண்டினாவில் ஆக்டோபஸ் படுகொலை

டிவியில் நேரடி ஒளிபரப்பு

தென் ஆப்ரிக்காவில் சமீபத்தில் நடந்த உலக கோப்பை கால்பந்து தொடரின்போது, ஜெர்மனி அருங்காட்சியகத்தை சேர்ந்த பால் என்ற 2வயது ஆக்டோபஸ் போட்டிகளின் முடிவுகளை முன்கூட்டியே சரியாகக் கணித்து உலகப் புகழ் பெற்றது. ஜெர்மனி அணி விளையாடிய 7 போட்டிகள் மற்றும் ஸ்பெயின் – நெதர்லாந்து மோதிய பைனல் என 8 போட்டியிலும் பால் சொன்ன அணிதான் வெற்றி பெற்றது. தனது துல்லியமான ஆரூடத்தால் ஆதரவாளர்களை மட்டுமல்ல எதிர்ப்பாளர்களையும் சம்பாதித்துக் கொண்டது அந்த ஆக்டோபஸ். ஜெர்மனி அரை இறுதியில் ஸ்பெயினிடம் தோற்கும் என்று கணித்ததால், உள்நாட்டில் அதற்கு ‘துரோகி’ பட்டம் கிடைத்தது. அதே சமயம் ஸ்பெயினில் குல தெய்வமாக வணங்கத் தொடங்கியிருக்கிறார்கள்.

ஜெர்மனியிடம் கால் இறுதியில் அர்ஜெண்டினா உதை வாங்கும் என்று சொன்னதான் அந்த நாட்டு ரசிகர்களும் ஆத்திரத்தில் உள்ளனர். அர்ஜெண்டினா டிவி சேனலில் ‘எ பர்பெக்ட் வேர்ல்டு’ என்ற நிகழ்ச்சியை நடத்தி வரும் ராபர்டோ என்பவர், நேரடி ஒளிபரப்பில் ஆக்டோபஸ் ஒன்றை வெறித்தனமாக கொலை செய்து ரசிகர்களை திருப்தி படுத்தியிருக்கிறார். ‘இதோ இந்த ஆக்டோபசை, நம்மை தோற்கடித்த பால் ஆக நினைத்துக் கொள்ளுங்கள். இப்போது இதன் கழுத்தை திருகப் போகிறேன். அப்படியே தலையை வெட்டி துண்டு துண்டாக்கி மிக்சியில் போட்டு அரைக்கிறேன்’ …என்று நேர்முக வர்ணனை கொடுத்தபடியே அந்த கொடூரத்தை அரங்கேற்றியிருக்கிறார்.

இந்த நிகழ்ச்சியால் அர்ஜெண்டினா கால்பந்து ரசிகர்கள் திருப்தி அடைந்திருந்தாலும் விலங்குகள் நல ஆர்வலர்கள் கடும் எதிர்ப்பு தெரிவித்திருக்கிறார்கள். பால் மீது இருந்த ஆத்திரத்தை ஒரு பாவமும் செய்யாத வேறு ஒரு அப்பாவி ஆக்டோபஸ் மீது காட்டுவதா? என்று டிவி சேனல் மீது வழக்கு தொடர்வது பற்றி ஆலோசித்து வருகிறார்களாம். 

நீல ரத்தம்…

ஆக்டோபஸ் ஒரு ஆச்சரியமான உயிரினம். கதைகளிலும் திரைப்படங்களிலும் பார்த்தது போல ராட்சத ஆக்டோபஸ்கள் இருப்பதாகத் தெரியவில்லை. நன்றாக வளர்ந்த ஆக்டோபஸ் 15 கிலோ எடை இருக்கும். அதிகபட்சமாக 71 கிலோ எடை கொண்ட ஆக்டோபஸ் ஒரு முறை பிடிபட்டிருக்கிறது.

+ ஆக்டோபஸ் உடலை பாதியாக வெட்டினால், 2 பக்க உடலும் எந்த மாற்றமும் இல்லாமல் சமமாக இருக்கும்.

+ ஆக்டோபஸ் மிகவும் புத்திசாலி என்கிறார்கள். எந்த விஷயத்தையும் உடனே கற்றுக் கொள்ளும். நம்மை போலவே குறுகியகால, நீண்டகால நினைவாற்றல் கொண்டது.

+ எலும்புக் கூடு கிடையாது.

+ எல்லா ஆக்டோபஸ்களுமே விஷத் தன்மை கொண்டவை என்றாலும், நீல நிற வளையங்கள் கொண்ட ஆக்டோபஸ் மட்டுமே மனிதனைக் கொள்ளும் அளவுக்கு விஷமுடையது.

+ 6 மாதத்தில் இருந்து அதிகபட்சமாக 5 ஆண்டு மட்டுமே உயிர் வாழும்.

+ செக்ஸ் உறவு கொண்ட ஆண் ஆக்டோபஸ் அடுத்த சில மாதங்களில் இறந்துவிடும். முட்டைகள் பொறித்த கொஞ்ச நாளில் பெண் ஆக்டோபசும் அவுட்.

+ 3 இதயம் கொண்டது. ஹீமோசயானின் என்ற ரசாயனம் இருப்பதால் ஆக்டோபஸ் ரத்தம் நீல நிறமாக இருக்கும்.    

பா.சங்கர்

ஆக்டோபஸ் 130 கேட்கும் ரசிகர்கள்

ஒரு மாத காலமாக கால்பந்து ரசிகர்களை பரவசத்தில் ஆழ்த்திய உலக கோப்பை 2010ன் சாம்பியன் யார் என்பது இந்நேரம் தெரிந்துவிட்டிருக்கும். ஸ்பெயின் அல்லது நெதர்லாந்து…யார் வென்றிருந்தாலும் 8வது புதிய சாம்பியனாக அந்த அணி கோப்பையில் தனது பெயரை பொறித்துக் கொண்டிருக்கும்.

கோல்டன் ஷூ, கோல்டன் பால் வென்ற வீரர்களை விட ஸ்பெயினிடம் அரை இறுதியில் ஜெர்மனி தோற்கும் என்று சரியாகக் கணித்த ஆக்டோபஸ் பால் தான் உலக சூப்பர் ஸ்டார். முடிவு முதலிலேயே தெரிந்துவிட்டதாலோ என்னவோ… ஜெர்மனி வீரர்கள் திக்பிரமை பிடித்தமாதிரி விளையாடினார்கள். அர்ஜெண்டினாவை ஓட ஓட விரட்டிய அணியா இது என்று ஆச்சரியமாக இருந்தது. ஜெர்மனி ஜெயிக்கும் என்று ஆக்டோபஸ் கணித்தபோது தூக்கி வைத்துக் கொண்டாடிய ரசிகர்கள், தங்கள் அணி தோற்றதற்கு ’துரோகி’ ஆக்டோபஸ் பால் தான் காரணம் என்று கொதித்தது வேடிக்கையாக இருந்தது.

‘ஆக்டோபஸ் 130’ போடுங்கள்… அப்படியே கிரில்லில் போட்டு சுக்காவாக வறுத்து எடுங்கள்… சுறா மீன் தொட்டிக்குள் தூக்கிப் போடுங்கள் என்று டுவிட்டரில் தண்டனை வழங்கிக் கொண்டிருந்தார்கள். ஸ்பெயினில் ஒரே கொண்டாட்டம். ‘அழிந்து வரும் இனமாக அறிவித்து அந்த ஆக்டோபசுக்கு தகுந்த பாதுகாப்பு வழங்க வேண்டும். எங்கள் சார்பில் பாடிகார்டுகளை அனுப்புவது பற்றி ஆலோசித்து வருகிறோம்’ என்று ஸ்பெயின் பிரதமர் ஜோக் அடித்தார்.

ஆக்டோபஸ் பால், வெற்றி பெறப் போகும் அணியைத் தேர்வு செய்யும் வைபவம் ஒளிபரப்பாகாத டிவி சேனலே இல்லை. ஜெர்மனியை சேர்ந்த நியூஸ் சேனல் ‘என்’ டிவி இரண்டு வர்ணனையாளர்களுடன் நேரடி ஒளிபரப்பு செய்து அமர்க்களப்படுத்தியது. வெறும் கால்பந்து போட்டியோடு நிறுத்திவிடாமல் அடுத்த தேர்தலில் எந்த கட்சி ஜெயிக்கும்? யார் பிரதமர்?... இப்படி பல்வேறு விஷயங்களுக்கும் ஆக்டோபசிடம் ஜோசியம் கேட்டு உலக அளவில் பெரிதாக பிசினஸ் செய்யலாமா என்று ஓபர்ஹாசன் நகர மீன் அருங்காட்சியக நிர்வாகிகள் யோசித்துக் கொண்டிருக்கிறார்கள். இரண்டு வயதாகும் பால் இங்கிலாந்தில் பிறந்து ஜெர்மனியில் குடியேறியவனாம்.

+ பராகுவே அணி தோற்றாலும், சிறப்பாக விளையாடிய வீரர்களை சிறப்பிக்கும் வகையில் ஏற்கனவே அறிவித்தது போல அசன்சியான் நகர வீதிகளில் நிர்வாணமாக ஓடப் போவதாகக் கூறி ரசிகர்களின் வயிற்றில் பால் வார்த்திருக்கிறார் மாடல் அழகி லரிஸா ரிகுல்மே. லைவ் ரிலே இருக்குமா? என்று  ரசிகர்கள் ஆவலோடு விசாரித்துக் கொண்டிருக்கிறார்கள்.

லரிஸாவுக்கு கிடைத்த உலகப் புகழ் மற்ற நாட்டு அழகிகளையும் உசுப்பேற்றிவிட்டிருக்கிறது. நெதர்லாந்து நாட்டின் ‘நீலப் பட’ நடிகை பாபி ஈடன் ஒரு படி மேலே போய், தங்கள் அணி வென்றால் டுவிட்டரில் தன்னை பாலோ செய்யும் அத்தனை ரசிகர்களையும் திருப்திப்படுத்தப் போவதாய் படுத்தியிருக்கிறார். அறிவிப்புக்கு முன் 23 ஆயிரமாக இருந்த ரசிகர்களின் எண்ணிக்கை இப்போது ஒரு லட்சத்தையும் தாண்டிவிட்டதாம். இதெல்லாம் கொஞ்சம் ஓவர் என்று கட்டுப்பெட்டி பா(ர்)ட்டிகள் பல்லைக் கடித்துக் கொண்டிருக்கிறார்கள்.

+ கால் இறுதியில் பிரேசில், அர்ஜெண்டினா உதை வாங்கியதுமே இந்திய ரசிகர்களின் ஆர்வம் காற்று போன பலூனாவிட்டது. ‘எங்களைப் பொருத்தவரை எல்லாம் முடிந்துவிட்டது. உடனடியாக நாடு திரும்புவதா? இல்லை தென் ஆப்ரிக்காவிலேயே தங்கியிருப்பதா என்பதை நீங்களே முடிவு செய்து கொள்ளுங்கள்’ என்று பத்திரிகைகள் தங்கள் நிருபர்களுக்கு இ-மெயில் அனுப்பிவிட்டன. ஆனாலும், கணிசமான இந்திய ரசிகர்கள் நள்ளிரவு போட்டிகளை கொட்டக் கொட்ட விழித்திருந்து பார்த்ததாக புள்ளி விவரங்கள் தெரிவிக்கின்றன. வேற்று நாடுகள் ஆடும்போதே இந்த அமர்க்களம் என்றால், உலக கோப்பையில் இந்தியா விளையாடினால் எப்படி இருக்கும்!

தூரத்தில் நம்பிக்கை வெளிச்சம் தெரியாமல் இல்லை. மீர் முகமது டிராபிக்கான தேசிய சப் ஜூனியர் கால்பந்து போட்டியில் 1500 பள்ளிகளை சேர்ந்த 40 ஆயிரம் சிறுவர்கள் விளையாட உள்ளனர். இந்த தொடரில் அசத்தும் பொடியன்கள் 16 வயதுக்குட்பட்ட இந்திய அணியில் இடம் பெறுவார்களாம். அப்படியே ஒரு 100 பேரை செலக்ட் செய்து அடுத்த 10 ஆண்டுகளுக்கு மூச்சு, பேச்சு, உணவு, உறக்கம் எல்லாமே கால்பந்துதான் என்ற அளவுக்கு பயிற்சி அளிப்பதுடன் அவர்களின் எதிர்கால வாழ்க்கைக்கும் உத்தரவாதம் கொடுக்க வேண்டும். இன்போசிஸ், டிசிஎஸ், ஐபிஎம், ரிலையன்ஸ், டாடா… என்று ஒவ்வொரு கார்பரேட் கம்பெனியும் வீரர்களைத் தத்தெடுத்து அணிகளை உருவாக்கி ஆதரிக்க வேண்டும். அப்படி ஆதரித்தால் வரிவிலக்கு உட்பட பல்வேறு சலுகைகள் வழங்கப்படும் என்று அரசு அறிவிக்க வேண்டும்.

இதெல்லாம் நடந்தால் 2018 உலக கோப்பையில் இந்திய அணி விளையாடுவது சர்வ நிச்சயம். கலாம் சொல்லியிருக்கிறார்… கனவு கண்டு கொண்டிருப்போம்.

பா.சங்கர்

நிர்வாணமாக ஓடுவாரா? ரசிகர்கள் ஆர்வம்

உலக கோப்பை கிளைமாக்சை நெருங்கிக் கொண்டிருக்கிறது. புதிய சாம்பியன் யார் என்பது அடுத்த வாரம் தெரிந்துவிடும். இரண்டாவது சுற்று வரை தென் அமெரிக்க நாடுகளின் ஆதிக்கமே மேலோங்கி இருந்தது. ஸ்பெயின், நெதர்லாந்து, கானா என மூன்று அணிகள் மட்டுமே மற்ற கண்டங்களில் இருந்து தப்பிப் பிழைத்திருந்தன.

பராகுவே அணி முதல் முறையாக கால் இறுதிக்குள் அடியெடுத்து வைத்த மகிழ்ச்சியில் ரொம்பவே அலட்டிக் கொண்டிருந்தது. பெனால்டி ஷூட்  அவுட்டில் பராகுவேயிடம் கோட்டை விட்ட ஜப்பான் வீரர்கள் கதறி அழுதது பரிதாபமாக இருந்தது. பராகுவே அணியை விட, அந்த நாட்டு ரசிகையும் சூப்பர் மாடலுமான லரிஸா ரிகெல்மேதான் இன்றைக்கு பட்டி தொட்டியெல்லாம் பேமஸ். இந்த ஐஸ்கிரீம் அழகியின் அமர்க்களமான போஸ்கள் அலங்கரிக்காத பத்திரிகை, இணையதளமே இல்லை. எல்லோரும் போட்டுவிட்டார்கள் என்பதற்காக நாம் போடாமல் இருந்தால் ரசிகர்களின் சாபத்துக்கு ஆளாக நேரிடும் என்பது எங்களுக்குத் தெரியாதா? இவரது செல் போன் ஸ்டாண்ட்தான் டாக் ஆப் தி வேர்ல்டு கப். பராகுவே அணி கோப்பையை ஜெயித்தால் ஆடைகளைக் களைந்து அம்மணமாக ஓடுவேன் என்ற அம்மணியின் அறிக்கை உலக ரசிகர்களை உண்டு இல்லை என்றாக்கிக் கொண்டிருக்கிறது. அடுத்த படத்துக்கு இவரை புக் பண்ணலாமா? என்று கோலிவுட் இயக்குனர்கள் ரூம் போட்டு யோசிக்கத் தொடங்கியிருக்கிறார்கள். அர்ஜெண்டினா ஜெயித்தால் தலைநகர் பியூனஸ் அயர்ஸ் வீதிகளில் நிர்வாணமாக ஓடுவேன் என்று பயிற்சியாளர் மரடோனா ஏற்கனவே சபதம் செய்திருந்தார்.

அப்படியெல்லாம் நடக்காது, பயப்படாதீர்கள். கால் இறுதியில் ஜெர்மனிதான் ஜெயிக்கும்’ என்று ஆக்டோபஸ் ஜோசியர் திருவாளர் பால் அவர்கள் அருள் வாக்கு கூற ஜெர்மனி ரசிகர்கள் கற்பனையில் மிதந்தனர். முடிவு என்னாயிற்று என்பது இந்நேரம் தெரிந்துவிட்டிருக்கும். ஆக்டோபஸை எங்கே வாங்கலாம்? வளர்ப்பது எப்படி என்று நம்மூர் ஜோசியக்காரர்கள் வலையில் தேடிக் கொண்டிருக்கிறார்கள்.

+ இங்கிலாந்து வீரர் லம்பார்டு அடித்த கோலை அனுமதிக்காத நடுவரும், அர்ஜெண்டினா வீரர் டெவேஸ் அடித்த ஆப்-சைடு கோலை அனுமதித்த நடுவரும் அதிரடியாக நீக்கப்பட்டுள்ளனர். கிரிக்கெட், டென்னிஸ் போல டிவி ரீப்ளே தொழில்நுட்பத்தை பயன்படுத்த வேண்டும் என்ற கோரிக்கையை ஆவேசமாக நிராகரித்த ‘பிபா’ தலைவர் செப் பிளாட்டர் அந்தர் பல்டி அடித்து அடுத்த உலக கோப்பைக்கு பரிசீலிக்கிறோம் என்று இறங்கி வந்ததுடன், நடுவர்களின் தவறுகளுக்காக மன்னிப்பு கேட்டார். ஒவ்வொரு தவறுக்கும் 50 கசையடி கொடுக்க வேண்டும் என்று பாதிக்கப்பட்ட அணிகளின் ரசிகர்கள் குமுறிக் கொண்டிருக்கிறார்கள். சம்பந்தப்பட்ட நடுவர்களுக்கு எக்ஸ் ஒய் இஸட் என எல்லா பிரிவு பாதுகாப்பும் போடப்பட்டிருக்கிறது.

+ உலக கோப்பை தோல்வியால் உருண்டு கொண்டிருக்கும் தலைகளும் ஏராளம். தோற்ற அணிகளின் பயிற்சியாளர்கள் ராஜினாமா கடிதத்தை ரெடியாக வைத்திருக்கிறார்கள். தோல்விக்கான காரணங்கள் பற்றி விசாரிக்க நாடாளுமன்ற உறுப்பினர்கள் குழு கூட அமைக்கப்படுகிறது. இந்த விஷயத்தில் ஜப்பான் வீரர்கள் கொடுத்து வைத்தவர்கள். பராகுவேயிடம் பெனால்டியில் கோட்டைவிட்டாலும், எதிர்பார்த்ததற்கு மேலாகவே அபாரமாக விளையாடி அசத்திய வீரர்களை ஜப்பான் ரசிகர்கள் சிவப்புக் கம்பளம் விரித்து ராஜ வரவேற்பு கொடுத்ததில் உச்சி குளிர்ந்து போயுள்ளனர்.  

+ ஆட்டங்களின் நெருக்கடியால் ஏற்படும் மன அழுத்தத்தில் இருந்து விடுபட, வீரர்கள் செக்ஸ் வைத்துக் கொள்ளலாம் என்று பிரேசில், அர்ஜெண்டினா, அமெரிக்கா, இங்கிலாந்து போன்ற அணிகளின் பயிற்சியாளர்கள் அனுமதி கொடுத்திருந்தனர். மனைவி, கேர்ள் பிரண்டு என்று கூட்டி வந்திருந்த வீரர்கள் குஷியாக என்ஜாய் செய்தார்கள். போட்டிக்கு முன்பாக செக்ஸ் என்பது காலம் காலமாகவே சர்ச்சையை ஏற்படுத்தி வருகிறது. இந்த விஷயத்தில் ஆதரவும் எதிர்ப்பும் 50/50 தான்.

‘போட்டிக்கு முன் தினம் இரவு பார்ட்னரோடு ரிலாக்சாக இருந்தால், விளையாடும்போது அப்படியே பறக்கிற மாதிரி இருக்கும். அது இல்லாவிட்டால் ஏதோ ஒன்று குறைந்த பீலிங்’ என்று அலுத்துக் கொள்கிறார் பிரேசில் முன்னாள் நட்சத்திரம் ரொமாரியோ. 1994ல் எங்கள் அணி கோப்பையை வென்றதற்கே இதுதான் முக்கிய காரணம் என்று ரகசியத்தை உடைக்கிறார் பிரான்கோ. நம்ம கிரிக்கெட் அணி பயிற்சியாளர் கேரி கிறிஸ்டனும் இதே போன்ற ஆலோசனைகளை வழங்கியதற்காக வாங்கிக் கட்டிக் கொண்டது ஞாபகத்துக்கு வருகிறது.

அரை இறுதி அமர்க்களம் முடிந்து பைனலில் கால்கலக்கப் போகும் அணிகள் எவை என்பது அடுத்த வாரம் தெரிந்துவிடும். அது வரை கோப்பை யாருக்கு? கோல்டன் ஷூ யாருக்கு? என்று கணக்குப் போட்டுக் கொண்டே இருங்கள்.

பா.சங்கர்

பயிற்சியாளர் ஈகோவால் பிரான்ஸ் பணால்

நாக்-அவுட் சுற்று தொடங்கிவிட்டதால் உலக கோப்பையில் புயல் வீசிக் கொண்டிருக்கிறது. நடப்பு சாம்பியன் இத்தாலியும், கடந்த முறை 2வது இடத்தைப் பிடித்த பிரான்ஸ் அணியும் முதல் சுற்றிலேயே மூட்டை கட்டியதுதான் மிகப் பெரிய அப்செட்.

இரண்டு அணிகளும் தங்கள் பிரிவில் கடைசி இடத்தைப் பிடிக்கும் என்பதை யாரும் கனவு கூட கண்டிருக்க முடியாது. கடந்த முறை வின்னரும்/ ரன்னரும் 2வது சுற்றுக்கு முன்னேறத் தவறுவது உலக கோப்பை வரலாற்றிலேயே இதுதான் முதல் முறை.

இத்தாலி அணியாவது கடைசி லீக் ஆட்டத்தில் ஸ்லோவகியாவிடம் 2-3 என்ற கோல் கணக்கில் போராடித் தோற்ற திருப்தியுடன் வெளியேறியது. பிரான்ஸ் நிலைமைதான் படு மோசம். பயிற்சியாளர் ரேமண்ட் டொமினிக் பற்றி நட்சத்திர வீரர் நிகோலஸ் அனெல்கா மோசமாக கமெண்ட் அடித்ததுடன் அதற்காக மன்னிப்பு கேட்க முடியாது என்று பிடிவாதமாக இருந்தார். விடுவாரா டொமினிக்? உலக கோப்பையில் இருந்து அனெல்காவை திருப்பி அனுப்பி தனது செல்வாக்கை காட்டினார்.

அதிருப்தி அடைந்த மற்ற வீரர்கள் பயிற்சிக்கே வராமல் முரண்டு பிடிக்க, பிரான்ஸ் அணி கவுரவம் அப்போதே டைவ் அடிக்க ஆரம்பித்துவிட்டது. தென் ஆப்ரிக்காவுடனான கடைசி லீக் ஆட்டத்தில் டொமினிக் தனக்கு பிடிக்காத வீரர்களையெல்லாம் கட்டம் கட்டி ஒதுக்க, செமத்தியாக உதை வாங்கியது பிரான்ஸ். பயிற்சியாளரின் ஈகோவால் நேர்ந்த இந்த சோகம் கங்குலி – சேப்பல் மோதலை நினைவூட்டியது.

இங்கிலாந்து, ஜெர்மனி போன்ற நட்சத்திர அணிகள் எல்லாம் தட்டுத் தடுமாறி 2வது சுற்றுக்கு முன்னேற, அமெரிக்கா சி பிரிவில் முதலிடம் பிடித்து கம்பீரமாக நுழைந்தது. அல்ஜீரியா அணியுடன் கடைசி லீக் ஆட்டத்தில் கடைசி விநாடியில் கோல் அடித்து அசத்தியது அமெரிக்கா. இந்த எதிர்பாராத முடிவால், ஸ்லோவேனியா வெளியேறியது சோகத்தின் உச்சக்கட்டம்.

தென் ஆப்ரிக்கா, ஸ்லோவேனியா, ஆஸ்திரேலியா, நியூசிலாந்து அணிகள் 2வது சுற்றுக்கு தகுதி பெறாவிட்டாலும் கடைசி வரை போராடி கவுரவமாக விடைபெற்றன. நாக்-அவுட் சுற்றில் ஒவ்வொரு ஆட்டமுமே வாழ்வா? சாவா? போராட்டம் என்பதால் ரசிகர்களின் இதயத் துடிப்பு எகிறிக் கொண்டிருக்கிறது.

+ ஐவரி கோஸ்ட் அணியுடனான லீக் ஆட்டத்தில் பிரேசில் வீரர் காகாவுக்கு ரெட் கார்டு காண்பித்து வெளியேற்றியது பெரும் சர்ச்சையை கிளப்பியது. காகா கால் எதேச்சையாக பட்டதால் கீழே விழுந்த ஐவரி கோஸ்ட் வீரர் காதர் கெய்தா, படுகாயம் அடைந்தது போல சூப்பராக நடித்ததில் ஏமாந்த நடுவர் 2வது மஞ்சள் அட்டையை காட்டிவிட்டார். இதனால் போர்ச்சுகல் அணியுடன் கடைசி லீக் ஆட்டத்தில் காகா விளையாட முடியாத நிலை ஏற்பட்டது. வட கொரியாவை 7-0 என்ற கோல் கணக்கில் போர்ச்சுகல் கலாய்த்தது இந்த உலக கோப்பையின் காமெடி பீஸ்.

+ அல்ஜீரியா லீக் ஆட்டத்தில் இங்கிலாந்து மோசமாக விளையாடி டிரா செய்ய, ஏமாற்றம் அடைந்த ரசிகர்கள் இங்கிலாந்து வீரர்களைக் கிண்டலடித்தனர். இதனால் ஆத்திரம் அடைந்த வேய்ன் ரூனி ரசிகர்களைப் பார்த்து கோபத்தில் கொப்பளித்தார். ஸ்லோவேனியா போட்டியில் வென்று ஒரு வழியாக நாக்-அவுட் சுற்றுக்கு முன்னேறிய பிறகு, ரசிகர்களிடம் மன்னிப்பு கேட்டார் ரூனி. அடுத்து வரும் ஆட்டங்களில் கோல் போட்டால்தான் ரூனியை மன்னிப்போம் என்கிறார்கள் ரசிகர்கள்.

+ ஐவரி கோஸ்ட் ஆட்டத்தில் பிரேசில் வீரர் பேபியானோ அசத்தலாக கோல் அடித்தார். அதற்கு முன்பாக பந்து அவரது கையில் 2 முறை பட்டது டிவி ரீபிளேயில் தெளிவாகத் தெரிந்தது. ஆட்டம் முடிந்ததும் இதை பேபியானோவும் ஒப்புக் கொண்டார். இந்த கோல் பற்றி, 1986 உலக கோப்பையில் ‘கடவுளின் கை’ உதவியுடன் கோல் அடித்த அர்ஜெண்டினாவின் மரடோனாவிடம் கேட்டபோது ‘பந்து 2 முறை கையில் பட்டது தெளிவாகத் தெரிகிறது. இந்த கோலை அனுமதித்திருக்கக் கூடாது’ என்று சொல்ல பிரேசில் வீரர்கள் காதில் புகை பறக்கிறது. பந்து கையில் பட்டதை கவணிக்கத் தவறிய நடுவர், பின்னர் டிவியை பார்த்து புன்னகைத்தது சரியான சோக காமெடி.

+ ஜூன் 22ல் இருந்து 25ம் தேதி வரை ஒரே நாளில் நான்கு போட்டிகள் நடந்ததால் ரசிகர்கள் திக்குமுக்காடிப் போயினர். ஆசிய கோப்பை இறுதிப் போட்டி, விம்பிள்டனில் இஸ்னர் – மாஹுத் மாரத்தான் ஆட்டம் என்று தவிர்க்க முடியாத ஈர்ப்புகளின் சுகமான தொல்லைகளும் கடந்த வாரம் விளையாட்டு ரசிகர்களைப் பாடாய்ப்படுத்தின.

நாக்-அவுட் சுற்றில் ஒரு நாளுக்கு 2 போட்டி மட்டுமே என்பதால் இனி ரிலாக்சாகப் பார்க்கலாம். அரை இறுதி, பைனல் எல்லாமே நள்ளிரவு ஆட்டங்கள். இந்திய ரசிகர்களுக்கு தூக்கம் தொலைவது காலத்தின் கட்டாயம்.


பா.சங்கர்

மெஸ்ஸி இட்லி… காகா வடை

உலக கோப்பை கலாட்டா

தென் ஆப்ரிக்காவில் நடக்கும் உலக கோப்பை கால்பந்து போட்டி சூடுபிடிக்கத் தொடங்கிவிட்டது. தென் கொரியாவை 4-1 என்ற கணக்கில் அர்ஜெண்டினா போட்டுத் தள்ளியதுதான் ஹாட் டாபிக்காக ஓடிக் கொண்டிருக்கிறது. எல்லோருடைய கவனமும் லயனல் மெஸ்ஸி மீதே இருக்க, ’ஜபுலானி’ கேப்பில் அர்ஜெண்டினாவின் கோன்சாலோ ஹாட்ரிக் கோல் அடித்து ஸ்பாட் லைட் வெளிச்சத்தை கொள்ளை அடித்தார். கோல்டன் ஷூ இவருக்குத்தான் என்று இப்போதே பெட் கட்ட ஆரம்பித்துவிட்டார்கள்.

என்னதான் திறமை இருந்தாலும் அதிர்ஷ்டமும் அவசியம் என்பது மெஸ்ஸி விஷயத்தில் புரூப் ஆகியிருக்கிறது. கிளப் போட்டிகளில் கோல் மழை பொழியும் மெஸ்ஸியால் உலக் கோப்பையில் சிறு தூறல் கூட போட முடியவில்லை. மனிதர் என்னதான் துல்லியமாக அடித்தாலும், பந்து வலைக்குள் நுழையாமல் அடம் பிடிக்கிறது. பல ஷாட்டுகள் கோல் கம்பத்தில் பட்டு திரும்ப, மெஸ்ஸி தலையில் கை வைத்தபடி நொந்து போனார். கோல் அடிக்காவிட்டாலும், அர்ஜெண்டினாவின் வெற்றிக்கு இவர்தான் அச்சாணி என்பதில் எந்த சந்தேகமும் இல்லை.

கோப்பை எங்களுக்குத்தான் என அர்ஜெண்டினா மிரட்டிக் கொண்டிருக்க சக பேவரைட்களான ஸ்பெயின், பிரான்ஸ் அணிகள் அதிர்ச்சித் தோல்விகளால் அரண்டு போயிருக்கின்றன. இந்த அணிகள் ‘நாக் அவுட்’ சுற்றுக்கு முன்னேறுவதற்குள் நாக்கு தள்ளிவிடும் போலிருக்கிறது. 

உலக செஸ் சாம்பியன் விஸ்வனாதன் ஆனந்த், மெஸ்ஸியின் பரம ரசிகராம். ‘லியோ விளையாடும் ஒரு போட்டியைக் கூட மிஸ் பண்ணமாட்டேன். அவரோட ஆட்டத்த பார்க்கும் போதுதான், கால்பந்து எவ்வளவு அழகான விளையாட்டுங்கறதே தெரியுது. அர்ஜெண்டினா அணிக்கு அதிக சான்ஸ் இருக்குன்னு நினைக்கிறேன். தூக்கம் கெட்டாலும் முடிஞ்ச அளவுக்கு எல்லா போட்டியையும் பார்த்துடனும்கிற முடிவோடதான் இருக்கேன்’ என்கிறார் ஆனந்த்.

ஒரு மிட்நைட் போட்டியை பார்த்தாலே மறுநாள் அலுவலகத்தில் தூங்கி வழிய வேண்டியிருக்கிறது. ஆஸ்திரேலியாவை சேர்ந்த சகோதரிகள் ஜோன்னி (22), அலோனா (24) இருவரும் தொடர்ந்து 87 மணி நேரம் உலக கோப்பை கால்பந்து ஒளிபரப்பை பார்த்து கின்னஸ் சாதனை படைத்திருக்கிறார்கள். தொடர்ச்சியாக 5 விநாடிக்கு மேல் டிவியை விட்டு கண்ணை அசைக்கக் கூடாது. ஒரு மணிக்கு 5 நிமிடம் மட்டுமே பிரேக். ஒரு நாளைக்கு 5 கப் காபி அல்லது டீதான் அலவ்டு. என்ன நீங்க ரெடியா? சகோதரிகளை கண்காணித்த கின்னஸ் குழுதான் தொடர்ந்து 48 மணி நேரமா தூங்கிக்கிட்டிருக்காம்!

டுவிட்டர் இணையதளத்தில் உலக கோப்பை போட்டி கொடி கட்டி பறக்கிறது. பிரேசில் கால்பந்து நட்சத்திரம் காகா, அர்ஜெண்டினா பயிற்சியாளர் மரடோனாவின் மச்சான் செர்ஜியோ (கவாஸ்கர் - விஸ்வநாத் மாதிரி), சர்வதேச கால்பந்து கூட்டமைப்பு ‘பிபா’ தலைவர் செப் பிளாட்டர்… என்று டுவிட்டரில் தகவல் பரிமாறும் பிரபலங்களின் எண்ணிக்கை எகிறிக் கொண்டே போகிறது. ஒரே நாளிலேயே பிளாட்டரை பாலோ செய்யும் ரசிகர்களின் எண்ணிக்கை 20,000த்தை தொட்டிருக்கிறது. விண்வெளியில் இருந்து கூட கேட்க முடியும் ஒரே சத்தம் ’வுவுஸுலா’ முழக்கம்தான் என்று ஒரு ரசிகர் ஹைகூ வடிக்க, இணையதள ரசிகர்களின் முற்றுகையில் மூச்சுமுட்டிக் கொண்டிருக்கிறது டுவிட்டர்.

’வுவுஸுலா’ குழல்களின் காதை பிளக்கும் ஓசையால் ‘பிபா’ மட்டுமல்ல பிபிசி சேனலும் திணறிக் கொண்டிருக்கிறது. உங்க வர்ணனையை ஒழுங்காவே கேட்க முடியவில்லை என்று 545 புகார்கள் வர, அந்த சத்தத்தை மட்டும் ஃபில்டர் செய்ய முடியுமா என்ற ஆராய்ச்சியில் பிபிசி பிஸி.

உலக் கோப்பை ஜுரம் தென் ஆப்ரிக்க ஓட்டல்களையும் விட்டுவைக்கவில்லை. ஓட்டலையே மினி ஸ்டேடியமாக மாற்றியிருக்கிறார்கள். நட்சத்திர வீரர்களின் கட் அவுட்கள், கோப்பையில் விளையாடும் 32 நாடுகளின் கொடிகள், ராட்சத திரையில் நேரடி ஒளிபரப்பு என்று களை கட்டுவதுடன் மெஸ்ஸி இட்லி, காகா வடை, ரொனால்டினோ தோசை, டிடியர் கிச்சடி என்று டிஷ்களுக்கு விதவிதமாகப் பெயர் வைத்து வாடிக்கையாளர்களைக் கவர்ந்து வருகிறார்கள்.

ரூனி 65 சாப்பிட்டுக் கொண்டே போட்டிகளை ரசித்துக் கொண்டிருங்கள். மீண்டும் சந்திப்போம்.

பா.சங்கர்

ஆனந்த் இந்தியரா?

அமைச்சகத்துக்கு வந்த அநியாய சந்தேகம்

விளையாட்டு வீரர்களை சீண்டிப் பார்ப்பதில் சிலருக்கு அற்ப சந்தோஷம். போட்டியில் பங்கேற்பதற்காக வெளிநாடு செல்லும் வீரர்களுக்கு குறித்த நேரத்தில் விசா வழங்காமல் வேண்டுமென்றே இழுத்தடிப்பார்கள். கொல்கத்தா ஈடன் கார்டன் மைதானத்தில் லிட்டில் மாஸ்டர் கவாஸ்கரையே உள்ளே விடாமல் கலாய்த்திருக்கிறார் ஒரு பாதுகாப்பு அதிகாரி. ‘மும்பை எல்லா இந்தியர்களுக்கும் சொந்தம். முதலில் நான் இந்தியன், பிறகுதான் மராத்தியன்’ என்று சொன்ன மாஸ்டர் பேட்ஸ்மேன் சச்சினுடன் மோதிப் பார்த்தார் பால் தாக்கரே. ஒட்டு மொத்த இந்தியாவும் சச்சினுக்கு ஆதரவாகப் பொங்கி எழ, ஜகா வாங்கிவிட்டார். இப்போது, உலக செஸ் சாம்பியனும் நம்ம ஊர் நாயகனுமான விஸ்வநாதன் ஆனந்தையும் வம்புக்கு இழுத்திருக்கிறார்கள்.

,நான்காவது முறையாக உலக சாம்பியன் பட்டத்தை வென்ற ஆனந்துக்கு, கவுரவ டாக்டர் பட்டம் கொடுத்து கவுரவிக்க ஆசைப்பட்டது ஐதராபாத் பல்கலைக்கழகம். இதற்காக, மனிதவள மேம்பாட்டு அமைச்சகத்திடம் முறைப்படி அனுமதி கேட்டது. விண்ணப்பத்தை பரிசீலித்த அதிகாரிக்கு, ஆனந்த் இந்தியக் குடிமகன்தானா? என்று திடீர் சந்தேகம். சர்வதேச போட்டிகளில் விளையாடுவதற்கு வசதியாக ஆனந்த் ஸ்பெயினில் தங்கியிருப்பதால், அந்நாட்டு பிரஜையாகிவிட்டிருப்பாரோ என்று அந்த அதிகாரி விளையாட்டாக சிந்தித்தது விபரீதமாகிவிட்டது.

ஐதராபாத் பல்கலை.யில் கடந்த வாரம் நடந்த கணித மாநாட்டின்போது ஆனந்துக்கு டாக்டர் பட்டம் வழங்க திட்டமிட்டிருந்த நிலையில், இந்த அர்த்தமற்ற கேள்வியால் டோட்டல் கொலாப்ஸாகிவிட்டது. ஏகத்துக்கு எரிச்சலான ஆனந்த், ‘போங்கடா நீங்களும் உங்கள் பட்டமும்… ஒரு மண்ணும் ’வேண்டாம்’ என்று ஒரே போடாய் போட்டார். மீடியா கிழி கிழியென்று கிழித்ததில் ஆடிப் போன அமைச்சர் கபில்சிபல், ஆனந்துக்கு போன் போட்டு சாரி சொன்னதோடு நீங்கள் விரும்பும் தேதியில் பட்டமளிப்பு விழாவை வைத்துக் கொள்ளலாம் என்று தாஜா செய்தார். போனால் போகிறதென்று ஓகே சொல்லியிருக்கிறார் ஆனந்த்.

‘டாக்டர் பட்டத்துக்காக நாங்கள் ஒன்றும் ஏங்கவில்லை. ஆனந்திடம் இந்திய பாஸ்போர்ட்தான் இருக்கிறது. உலகின் எந்த மூலையில் விளையாடினாலும் அவருக்கு அருகே இந்திய தேசியக் கொடிதான் இருக்கும். அவர் இந்தியர்தான் என்பதை நிரூபிக்க வேறு எதை எதிர்பார்க்கிறார்கள் என்று விளங்கவில்லை’ என்று கொதிக்கிறார் ஆனந்தின் மனைவி அருணா.

இந்தியாவில் இருந்து வெளிநாடுகளுக்கு செல்பவர்கள் அங்கே தங்கள் துறைகளில் வெற்றிக் கொடி நாட்டும் போதெல்லாம், நாடே அந்த சாதனையில் பெருமையும் பெருமிதமும் அடைவது வாடிக்கை. கல்பனா சாவ்லா முதல் அர்ஜுன் ஆத்வால் வரை அப்படித்தான் கொண்டாடி வருகிறோம். அப்படி இருக்கையில், ஆனந்த் பற்றி இப்படியொரு சர்ச்சையை மனிதவள மேம்பாட்டு அமைச்சகம் உருவாக்கியதை எந்த வகையிலும் நியாயப்படுத்த முடியாது. சாக்கு போக்கு சொல்லிக் கொண்டிருக்காமல், இது போன்ற தவறு இனி எப்போதும் நடக்காத வகையில் நடவடிக்கை எடுக்க வேண்டியது அவசியம்.

பா.சங்கர்

சாதனை நாயகனின் வெற்றிப் பயணம்…

சச்சின் – சாதனையின் மறு பெயர். கிரிக்கெட் களத்தில் கடந்த 20 ஆண்டுகளுக்கும் மேலாக ஓடிக் கொண்டிருக்கும் இவரது பயணம், கொஞ்சம் கூட தொய்வில்லாமல் தொடர்ந்து கொண்டிருக்கிறது. இனி இவர் களமிறங்கும் ஒவ்வொரு போட்டியும், சந்திக்கும் ஒவ்வொரு பந்தும், அடிக்கும் ஒவ்வொரு ரன்னும் ஒரு சாதனை மைல்கல் என்னும் அளவுக்கு சிகரத்தை அடைந்து வானத்தில் ஏறிக் கொண்டிருக்கிறார்.

ஆஸ்திரேலியாவுடன் பெங்களூரில் நடந்த 2வது டெஸ்ட் போட்டியில் 14,000 ரன்னைக் கடந்ததுடன் தனது 6வது இரட்டை சதத்தையும் பதிவு செய்து அசத்தியிருக்கிறார். ‘டென்னிஸ் எல்போ’ பாதிப்பால் அவதிப்பட்டபோது, தனது இயல்பான ஆட்டத்தை வெளிப்படுத்த முடியாமல் சராசரியில் சற்றே சறுக்கினார். உடனே சில அரைவேக்காட்டு விமர்சகர்கள் ‘சச்சின் கெட் அவுட்’ என்று எழுதி தங்கள் அதிமேதாவித்தனத்தை வெளிச்சம் போட்டார்கள்.

இது போன்ற உளறல்களுக்கெல்லாம் சச்சின் பதில் சொல்வதே இல்லை! அவரது மட்டைதான் வட்டியும் முதலுமாக சேர்த்து நெத்தியடி கொடுத்து வருகிறது. பெங்களூர் டெஸ்டில் வெற்றிக்கான இரண்டு ரன்களையும் சச்சின் ஓடி எடுத்த விதம் அவரது உடல்தகுதிக்கும், மன உறுதிக்கும் எடுத்துக்காட்டாக இருந்தது.

எதோ 16 வயது சிறுவனைப் போல மின்னல் வேகத்தில் ஓடி, இலக்கை எட்டியதும் துள்ளிக் குதித்து வெற்றியைக் கொண்டாடிய சச்சினைப் பார்த்த யாரும் அவருக்கு 37 வயது ஆகிறது என்பதை நினைத்துக் கூட பார்க்க முடியாது. டெஸ்ட் போட்டிகளில் ஒரே ஆண்டில் 1000 ரன்களைக் கடக்கும் சாதனையையும் சச்சின் 6வது முறையாக நிகழ்த்தினார். அவர் ஒவ்வொரு சாதனையாக தகர்த்து முன்னேறியபோது, எதிரணி கேப்டன் பான்டிங்கும் அவரது சகாக்களும் கூட மெய்மறந்து கைதட்டிய காட்சி கண்ணுக்குள்ளேயே நிற்கிறது.

சச்சினுடைய சாதனைகளை பற்றி குறைந்தபட்சம் இன்னும் 50 ஆண்டுகளுக்காவது உலக ரசிகர்கள் பேசிக் கொண்டிருப்பார்கள் என்கிறார் முன்னாள் கேப்டன் கபில்தேவ். கிரிக்கெட் உலகின் மகத்தான வீரர் சச்சின் என்று அடித்துச் சொல்கிறார் வெஸ்ட் இண்டீஸ் முன்னாள் நட்சத்திரம் விவியன் ரிச்சர்ட்ஸ். சர்வதேச போட்டிகளில் 100 சதம் அடித்த முதல் வீரர் என்ற பெருமையைப் பெற சச்சினுக்கு இன்னும் 5 சதம்தான் தேவை. இந்த ஆண்டுக்குள்ளாகவே அவர் அந்த சாதனையையும் தனதாக்கிக் கொண்டால் ஆச்சரியப்பட அவசியமே இல்லை. அப்படி ஒரு சூப்பர் பார்மில் இருக்கிறார். யாருக்குமே பணம், புகழ், செல்வாக்கு குவியும்போது போதை தலைக்கேறுவது வாடிக்கைதான். அமெரிக்க கோல்ப் வீரர் டைகர் உட்ஸ், இங்கிலாந்து கால்பந்து வீரர் வேய்ன் ரூனி உள்பட ஏராளமான பிரபலங்கள் சர்ச்சைகளில் சிக்கி சந்தி சிரிக்கும்போது, சாதனை சக்கரவர்த்தியாக விளங்கும் சச்சின் இன்னும் தன்னை ஒரு அறிமுக வீரராகவே எண்ணி கண்ணும் கருத்துமாக விளையாடுவது இளம் வீரர்கள் ஒவ்வொருவரும் கற்க வேண்டிய பாடம்.

எல்லா சாதனைகளையும் ஒரு கை பார்த்துவிட்ட சச்சினுக்கு ஒரே மனக்குறை… உலக கோப்பையை வெல்லாததுதான். அடுத்த உலக கோப்பை போட்டிக்கு இன்னும் சில மாதங்களே உள்ள நிலையில், எந்த சவாலுக்கும் நான் ரெடி என்று சிங்கம் போல சிலிர்த்து நிற்கிறார் சச்சின். சக இந்திய வீரர்களும் தோள் கொடுத்தால், சொந்த மண்ணில் நடக்கும் உலக போட்டியில் டோனி அண்ட் கோ கோப்பையை கைப்பற்றுவது உறுதி.

பா.சங்கர்

முத்து முத்தாய் முத்தையா முரளிதரன்…

இந்திய அணியுடன் காலே சர்வதேச மைதானத்தில் நடந்த முதல் டெஸ்டுடன், இலங்கை சுழற்பந்து வீச்சாளர் முத்தையா முரளிதரன் டெஸ்ட் போட்டிகளில் இருந்து ஓய்வு பெற்றுள்ளார். தனது கடைசி டெஸ்டின் கடைசி பந்தில் 800வது விக்கெட்டை வீழ்த்தி சாதனை படைத்த முரளி பற்றிய சுவாரசியமான புள்ளி விவரங்களின் தொகுப்பு…

+ இலங்கையின் கண்டி நகரில் 1972, ஏப்ரல் 17ம் தேதி பிறந்தவர். பூர்வீகம் தென் தமிழகம். மூன்று தம்பிகள்.

+ தொடக்கத்தில் வேகப்பந்து வீச்சாளராக இருந்தவர், 14வது வயதிலேயே சுழலுக்கு மாறிவிட்டார்.

+ 20 வயதில் ஆஸ்திரேலியாவுக்கு எதிராக டெஸ்ட் போட்டியில் அறிமுகம் (1992).

+ இலங்கை அணிக்காக சர்வதேச போட்டிகளில் களமிறங்கிய ஒரே தமிழர்.

+ டெஸ்ட் (800) மற்றும் ஒருநாள் போட்டிகளில் (515) அதிக விக்கெட் வீழ்த்தி முதலிடம். பேட்டிங்கில் சச்சின் போல பந்துவீச்சில் பல உலக சாதனைக்கு சொந்தக்காரர்.

+ டெஸ்டில் சிறந்த பந்துவீச்சு: ஒரு இன்னிங்சில் 9/51, ஒரு போட்டியில் 16/220, 5 விக்கெட் 67 முறை, 10 விக்கெட் 22 முறை.

+ தொடர்ச்சியாக 4 டெஸ்டில் தலா 10 விக்கெட் வீழ்த்திய சாதனையை 2 முறை நிகழ்த்தியுள்ளார்.

+ டெஸ்ட் விளையாடும் எல்லா அணிகளுக்கு எதிராகவும் 50+ விக்கெட் கைப்பற்றிய ஒரே பந்துவீச்சாளர்.

+ டெஸ்டில் அதிக முறை ‘தொடர் நாயகன்’ விருது (11) பெற்ற வீரர்.

+ அதிரடியாக பேட்டிங் செய்யக் கூடியவர் என்றாலும், சர்வதேச கிரிக்கெட்டில் அதிக முறை டக் அவுட் ஆன வீரர் (59) இவர்தான்.

+ 1995ல் ஆஸி. அணியுடனான டெஸ்டில், முரளிதரன் பந்தை எறிவதாக நடுவர் டேரல் ஹேர் 5 முறை எச்சரித்தார். இலங்கை கேப்டன் ரணதுங்கா ஆட்டத்தை நிறுத்திவிட்டு சக வீரர்களுடன் பெவிலியன் திரும்பி ஆலோசிக்க பெரும் பரபரப்பு ஏற்பட்டது.

+ பந்தை எறிவதாக சர்ச்சை தொடர்ந்ததால் 4 முறை ‘பயோமெட்ரிக்ஸ்’ சோதனை நடத்தப்பட்டது. அதில், முரளியின் பந்துவீச்சு முறையாக இருப்பதாக ஐசிசி அறிவித்தது.

+ இயற்கையாகவே இவரது வலது முழங்கை சற்று வளைந்து இருக்கும்.

+ தூஸ்ரா, டாப் ஸ்பின்னர், பிலிப்பர்… போன்ற இவரது வித்தியாசமான பிரம்மாஸ்திரங்கள் எந்த பேட்ஸ்மேனையும் திணறச் செய்யும். எப்படிப்பட்ட களத்திலும் பந்தை சுழற்றி திரும்பச் செய்யக் கூடியவர்.

+ சென்னை மருமகன். மலர் மருத்துவமனை டாக்டர் ராமமூர்த்தி தம்பதியினரின் மகள் மதிமலரை மணந்துள்ளார். மகன் நரேன்.   

பா.சங்கர்

டபுள்ஸ் தில்லாலங்கடி ஜ்வாலா கட்டா

எட்டு முறை தேசிய பேட்மிண்டன் மகளிர் இரட்டையர் பிரிவில் சாம்பியன் பட்டம் வென்ற வீராங்கனை ஜ்வாலா கட்டா என்றால் கூட பலருக்கு தெரியாது. இந்திய கிரிக்கெட் அணி முன்னாள் கேப்டனும் காங்கிரஸ் எம்.பி.யுமான அசாரருதீன் தனது 2வது மனைவி நடிகை சங்கீதா பிஜ்லானியை விவாகரத்து செய்துவிட்டு, ஜ்வாலா கட்டாவை மணக்கப் போகிறார் என்று கடந்த வாரம் புகையத் தொடங்கி ஜுவாலை விட்டெரிந்தது. ‘ஜ்வாலா எனது நல்ல நண்பர், அதற்கு மேல் எங்களுக்குள் எதுவும் இல்லை. பேட்மிண்டன் சங்க தேர்தலில் நான் நிற்பது பிடிக்காத சில நிர்வாகிகள்தான் இப்படி கிளப்பிவிட்டிருக்கிறார்கள்’ என்கிறார் அசார்.

இந்த புரளியால் ஜ்வாலா கட்டாவும் செம அப்செட். இந்த கலாட்டாவுக்கு அப்புறம்தான் கட்டா யார்? என்ற ஆர்வம் பல லட்சம் இந்தியர்களை இண்டர்நெட்டில் தேட வைத்திருக்கிறது. சர்ச் என்ஜினில் ஜே…டபுள்யூ என்று தட்டினாலே ஜ்வாலா கட்டா என்று வரும் அளவுக்கு பேமஸ் ஆகிவிட்டார். சானியா, சாய்னாவை தந்த அதே புண்ணிய பூமி ஐதராபாத்தான் இந்த 26 வயது தேவதைக்கும் சொந்த ஊர். 1983 செப்டம்பர் 7ல் பிறந்தவர்.

தந்தை இந்தியர், தாய் சீன இறக்குமதி. இவரது தாத்தா மகாத்மா காந்தியுடன் சேவாஸ்ரமத்தில் தங்கியிருந்து அவரது வாழ்க்கை வரலாற்றையும் பிற படைப்புகளையும் சீன மொழியில் மொழிபெயர்த்திருக்கிறார். கொஞ்சம் உற்றுப் பார்த்தால் ஜ்வாலா முகத்தில் ஒளிந்திருக்கும் சீன களை தெளிவாகத் தெரியும்.

பத்து வயதில் பேட்மிண்டன் பயிற்சியை ஆரம்பித்தவர், மூன்றே ஆண்டுகளில் மினி நேஷனல் சாம்பியன். புத்தாயிரமாவது ஆண்டில் தேசிய ஜூனியர் சாம்பியன் பட்டம் வென்றபோது ஜ்வாலாவின் வயது 17. அதே ஆண்டில் ஸ்ருதி குரியனுடன் இணைந்து ஜூனியர் மற்றும் சீனியர் இரட்டையர் பிரிவில் தேசிய சாம்பியன் பட்டம். டென்னிசில் பயஸ், பூபதி மாதிரி பேட்மிண்டனில் ஜ்வாலா டபுள்ஸ் ஸ்பெஷலிஸ்ட். தொடர்ச்சியாக 8 ஆண்டுகள் மகளிர் இரட்டையர் பிரிவில் தேசிய சாம்பியன் பட்டம் வென்றிருக்கிறார். சாய்னாவின் பயிற்சியாளர் புல்லேலா கோபிசந்த்துடன் இணைந்து கலப்பு இரட்டையர் பிரிவிலும் கலக்கியிருக்கிறார். கோபிசந்த்துக்குப் பிறகு லலியவீட்டில் திஜுவுடன் இணைந்து இவரது டபுள்ஸ் வெற்றிப் பயணம் தொடர்கிறது.

சர்வதேச கிராண்ட் பிரீ பேட்மிண்டன் கலப்பு இரட்டையர் பிரிவில் தங்கம் வென்ற முதல் இந்திய ஜோடி இது. கடந்த ஆண்டு டிசம்பரில், மலேசியாவில் நடந்த சூப்பர் சீரீஸ் மாஸ்டர்ஸ் போட்டியின் பைனலுக்கு முன்னேறியது திஜு – கட்டா ஜோடியின் சூப்பர் சாதனை.

தேசிய பேட்மிண்டன் சாம்பியனும் அர்ஜுனா விருது பெற்றவருமான சேத்தன் ஆனந்த், ஜ்வாலாவின் காதல் கணவர். இவர்களுக்குள் கருத்து வேறுபாடு ஏற்பட்டு பிரிந்து வாழ்வதாகவும் ஒரு தகவல் உலவிக் கொண்டிருக்கிறது. ’இதற்கெல்லாம் பதில் சொல்லிக் கொண்டிருக்க எனக்கு நேரமில்லை. காமன்வெல்த் போட்டியில் தங்கம் அள்ள வேண்டும் என்பதில் மட்டுமே கவனம்’ என்கிறார் கட்டா. பதக்கத்துடன் போஸ் கொடுத்தால் இதே பக்கத்தில் ’கட்டா’யம் போட்டுவிடுவோம்.  

பா.சங்கர் 

சண்டை… சச்சரவு… செக்ஸ்…

திணறும் இந்திய ஹாக்கி

ஒலிம்பிக் தங்கப் பதக்கத்தை குத்தகைக்கு எடுத்திருந்த காலமெல்லாம் மலையேறிப் போய் நிர்வாகத்தில் கோஷ்டி மோதல், நடுவரின் மண்டை உடைப்பு, பயிற்சியாளர் மீது செக்ஸ் புகார், அழகிகளுடன் உல்லாசமாக இருந்த வீடியோகிராபர் டிஸ்மிஸ்...என்று இந்திய ஹாக்கியின் அந்தஸ்து அதளபாதாளத்தில் விழுந்து கிடக்கிறது.

வீரர்களை அணியில் சேர்க்க பல லட்சம் லஞ்சம் வாங்கியதாக வீடியோ ஆதாரம் வெளியானதால் இந்திய ஹாக்கி கூட்டமைப்பு கூண்டோடு கலைக்கப்பட்டு  ஹாக்கி இந்தியா என்ற புதிய அமைப்பின் கீழ் இடைக்கால நிர்வாகம் ஏதோ உருட்டிக் கொண்டிருக்கிறது. இதன் நிர்வாக பதவிகளுக்கான தேர்தலில் அரசியல் சூடு பறக்கும் நிலையில், கடந்த வாரம் இந்திய ஹாக்கிக்கு சபிக்கப்பட்ட வாரமாக அமைந்துவிட்டது.

ஜூலை 19: போபாலில் தேசிய சீனியர் ஹாக்கி போட்டி. மூன்றாவது இடத்துக்கு தமிழகம் - சண்டிகர் அணிகள் மோதிய ஆட்டம். மைதானத்துக்கு வெளியே வீரர்கள் அமரும் ‘டக் அவுட்’ கூடாரத்தை இடமாற்றம் செய்வதில் தமிழக வீரர்களுக்கும் நிர்வாகிகளுக்கும் இடையே எழுந்த வாக்குவாதம் களேபரமாகி கைகலப்பில் முடிய, போட்டி தாமதமாகத் தொடங்கியது. இப்போட்டியில் தமிழகம் 3-2 என்ற கோல் கணக்கில் வென்று வெண்கலப் பதக்கம் வென்றது. மைதானத்துக்கு வெளியே நடந்த மோதலுக்காக தமிழ்நாடு அணி கேப்டனும் ஒலிம்பியனுமான ஆடம் சின்க்ளேர் அடுத்த ஆண்டுக்கான தேசிய போட்டியில் களமிறங்கத் தடை விதிக்கப்பட்டது. இந்த பரபரப்பு அடங்குவதற்குள்ளாகவே, அடுத்த அதிர்ச்சி செய்தி சென்னையில் இருந்து.

சென்னையில் நடக்கும் முருகப்பா தங்க கோப்பை ஹாக்கி போட்டியில், ஓஎன்ஜிசி - ஆர்மி லெவன் அணிகள் மோதிய லீக் ஆட்டம். தமிழகத்தை சேர்ந்த நடுவர் சூரியபிரகாஷ் ஆர்மி வீரருக்கு 2 பச்சை அட்டைகளை காண்பிக்க சர்ச்சை ஆரம்பம். ஆர்மி வீரர்கள் நடுவரை சூழ்ந்து கொண்டு காரசாரமாக வாக்குவாதம் செய்த நிலையில், சூர்யபிரகாஷ் மண்டையில் ஹாக்கி மட்டையால் ஓங்கி அடித்தார் சுனில் எக்கா. இவர் இந்திய அணிக்காக விளையாடிய வீரர். ரத்தம் சொட்டச் சொட்ட மயங்கி விழுந்த நடுவருக்கு 20 தையல் போட்டு அவசர சிகிச்சை அளிக்கப்பட்டது. முருகப்பா போட்டியில் இருந்து எக்கா உடனடியாக நீக்கப்பட்டார். ஹாக்கி போட்டிகளில் விளையாட அவருக்கு 6 மாத தடை விதிக்கப்பட்டது.

ஜூலை 20: மீடியாக்கள் இந்த செய்திகளை பரபரப்பாக போட்டு அடித்து ஓய்வதற்குள்ளாகவே அடுத்த குண்டு மகளிர் ஹாக்கி அணி தரப்பில் இருந்து வீசப்பட்டது. சமீபத்தில் மகளிர் அணி சீனா மற்றும் கனடாவில் சுற்றுப்பயணம் செய்தது. இந்த தொடர்களின்போது, அணியின் அதிகாரப்பூர்வ வீடியோ பதிவாளர் பசவராஜ் விபசார அழகிகளுடன் உல்லாசமாக இருந்த புகைப்படங்களுடன், பயிற்சியாளர் கவுஷிக் வீராங்கனைகளுக்கு செக்ஸ் தொந்தரவு கொடுப்பதாக புகார் கடிதமும் இணைக்கப்பட்டு ஹாக்கி இந்தியா நிர்வாகத்துக்கு வந்த இ-மெயில் பூதாகரமாக வெடித்தது.

பாலியல் புகார் சர்ச்சையை விசாரிக்க 4 நபர் கமிஷன் அமைக்கப்பட்டுள்ளது. வீடியோகிராபர் பசவராஜ் அதிரடியாக டிஸ்மிஸ் செய்யப்பட்டார். பதவி விலகுவதாக அறிவித்த பயிற்சியாளர் எம்.கே.கவுஷிக், ‘எனக்கு எதிராக பெரிய அளவில் சதி நடக்கிறது. அணியில் இடம்பெற முடியாத சில வீராங்கனைகள் வேண்டுமென்றே செக்ஸ்புகார் கூறியுள்ளனர். நான் நிரபராதி என்பதை நிரூபிப்பேன்’ என்று சொல்லியிருக்கிறார்.

முப்பதுக்கும் மேற்பட்ட வீராங்கனைகள் ஒன்றாக பொய் சொல்லுவார்களா? பயிற்சியாளர் மீதும் தகுந்த நடவடிக்கை எடுக்க வேண்டும் என்று முன்னாள் வீரர், வீராங்கனைகள் வலியுறுத்தியுள்ளனர். 24 மணி நேரத்தில் அடுத்தடுத்து எழுந்த சர்ச்சைகளால் இந்திய ஹாக்கி தலை குனிந்து நிற்க, கவுரவம் தரைமட்டமாகி தவழ்ந்து கொண்டிருக்கிறது.

இந்த நிலையில், 5 ஆண்டுகளுக்குப் பிறகு சாம்பியன்ஸ் டிராபி போட்டியை இந்தியாவில் நடத்த (2011, டிசம்பர்) சர்வதேச ஹாக்கி சம்மேளனம் அனுமதித்துள்ளது. அதற்குள்ளாகவாவது இந்திய ஹாக்கி நிர்வாகத்தை சீர்படுத்தி,

கறுப்பு ஆடுகளை களபலி கொடுத்து சாப விமோசனம் பெற வேண்டும். செய்வார்களா?

பா.சங்கர்